Adyé zot tout !
Si nou ekri zordi lé pou inform azot ke nou vé pi aparet kom sinyatér pou lo kolektif laproptaz.
O dépar nou té sinyatér pask nou té krwa ke lo rézilta laproptaz loré met anlér bann zasosyasyon la sosyété sivil .
Apré plizyér zané ek bann reinyon ousa nou la été téni à lékar nou la apri par vwa dpress ke lo stati Mahé Labourdonnais sora déplasé ziska la kazern lanber ousa bann FAZSOÏ néna zot baz. Nou rogret ke nou la pa été konsilté parapor lo désizyon la.
Néna osi pou nou in sinbolik ke i kol pa avek nout langazman o final. Si nou té vé té la sosyété sivil té a la baz lo mouvman té pou évit bann rékiperasyon politik. Ke néna in rolé ék lo bann zéli nou pé konprand, mé sak nou wa komela sé ke lo prozé final i mét plis an lér la méri sindni ek la répiblik (par lo préfé) ke la sosyété sivil militant ke i port in memwar diféran si lo rol la répiblik dan lo Kad lo kolonyalism é sirtou dan la kolonyalité lo pouvwar ziska zordi.
Avek sa, nou konsidér ke si nou déplas lo stati ver la kazern i donn in limaz diféran de sak poukwé nou vé batay. Si nou libér lespas piblik i fo pa non pli nou fé kado in baz militér son stati kom in meday, san ke nou di pa riyin ansuit.
Met in stati in zesklavazis dann in kazern sé konfirm osi lo lyin larmé komela néna ek listwar kolonyal esklavazis. Finalkont alork nou vé liber lespas piblik nou konfirm ke dan nout péi néna in striktir privé délimité ek in léspas lé dedyé a la glwar lo sipremasis oksidantalis. Sa i sar kont sak nou vé kréé kom sosyété. Mém si pou bonpé lo soubatkoz la pankor ariv si lo tem la, pou nou lo sinbolik néna deryer laksyon la i sar pa si in somin pou nout lémansipasyon. Sirtou si évit koz lo rol bann FAZSOÏ komela. In rol néokolonyalis o servis linperyalism Lafrans.
Sak nou wa ek lo rekipérasyon laksyon « laproptaz », nou estim ke la répiblik dan son rôle kolonyal i kontinyé aménaz la dominasyon si lorganizasyon nout teritwar. Nou konsidér ke nout péi i dwa pi etr défandi ek bann sinbol oubyin bann valér kolonyal é esklavazis. Nou estim nou dwa libér lespas piblik mé libér osi lespri bann militér ek tout bann kaparér i rant si nout tér …É nou vé pa oubliyé osi koman linperyalis Lafrans i itiliz nout zil dann in rol néokolinizatér pou nout rezyon loséan indyin. Par solidarité ek nout bann péi vwazin é frér nou rofiz dékor in larmé néokolonyal i okip nout péi ek in stati zesklavazis.
Pou sa mém nou domand azot tir nout non dan tout laksyon an kour dann kolektif « laproptaz ».
… Nou tyinbo.
Ka-Ubuntu
Source :
Image ; Réunion la 1ère.
